Leta Zunze Ubumwe za Amerika zatangaje ko zagurishije intwaro Israel zifite agaciro ka miliyoni 151,8$, icyemezo cyafashwe Inteko Ishinga Amategeko itagishijwe inama.
Ibi byatangajwe n’Umunyamabanga wa Leta Zunze Ubumwe za Amerika Ushinzwe Ububanyi n’Amahanga, Marco Rubio, wagaragaje ko Israel iri mu bihe bidasanzwe ari yo mpamvu yahise igurisha izo ntwaro bidasabye ko Inteko Ishinga Amategeko ibyemeza, ndetse ko biri mu nyungu z’umutekano wa Amerika.
Amerika igaragaza ko Israel yayisabye intwaro zirimo ibisasu ibihumbi 12 biri mu bwoko bwa ‘BLU-110A/B.
Izi ntwaro Israel yaziguze binyuze mu kigo cya Amerika gikora ibikoresho bya gisirikare cyo muri Leta ya Texas, Repkon USA.
Icyakora bamwe mu bagize Inteko Ishingamategeko bagaragaza ko ko kugurisha izo ntwaro batabyemeje, bigaragaza ko ntakwitegura bihagije Amerika yagize ku ntambara ya Israel na Iran , nk’uko Gregory Meeks wo mu Ishyaka ry’Aba-Démocrates yabivuze.
Ati “Ubuyobozi bwa Trump bwagiye bugaragaza ko bwiteguye intambara. Kwisunga ibihe bidasanzwe ukirengagiza Inteko bivuga inkuru itandukanye. Ibi ni ibihe bidasanzwe ubutegetsi bwa Trump bwiremeye.”
Iyi ntambara yatangiye tariki ya 28 Gashyantare 2026, ubwo Leta Zunze Ubumwe za Amerika na Israel byarasaga muri Iran, bikica abayobozi benshi bayo bo ku rwego rwa gisivili n’abarimo Umuyobozi w’Ikirenga, Ayatollah Ali Khamenei.
Mu rwego rwo kwihorera, Iran na yo yagabye ibitero bikomeye muri Israel no mu bindi bihugu byo mu Burasirazuba bwo Hagati birimo ibirindiro by’Ingabo za Amerika nka Leta Zunze Ubumwe z’Abarabu, Qatar, Koweit, Bahrain, Arabie Saoudite na Iraq.
Amerika ifite ingabo zirenga ibihumbi 60 mu gice cy’Uburasirazuba bwo Hagati. Inyinshi ziri muri Arabie Saoudite, Koweit na Qatar, ariko hari n’izigera ku bihumbi 10 ziri ku Nyanja ya Méditerranée ahari mu bwato bunini bwa USS Gerald R. Ford no mu Nyanja y’Abahinde, ahari ubwato bwa USS Abraham Lincoln.
