Komisiyo ishinzwe Imyitwarire mu Mpuzamashyirahamwe y’Umupira w’Amaguru muri Afurika (CAF) yafatiye ibihano bikomeye Ishyirahamwe rya Ruhago muri Sénégal n’iryo mu Bwami bwa Maroc, ndetse ihagarika Umutoza Pape Thiaw n’abakinnyi batandukanye ku mpande zombi.
Ni nyuma y’imvururu zaranze umukino wa nyuma w’Igikombe cya Afurika cya 2025 wabereye i Rabat muri Maroc ku wa 18 Mutarama 2026.
Uyu mwanzuro watangajwe mu ijoro rishyira kuri uyu wa Kane, nyuma yo kumva impande zombi mu nama yabaye ku wa Kabiri, tariki ya 27 Mutarama 2026.
Ku Ishyirahamwe ry’umupira w’Amaguru muri Sénégal, CAF yatangaje ko Pape Thiaw utoza iki gihugu yahagaritswe imikino itanu y’amarushanwa ya CAF kubera imyitwarire itari iy’abazi ibya siporo yagaragaje, ihabanye n’amahame ngengamyitwarire yayo.
Uyu Mutoza ashinjwa kuba ari we pwagize uruhare mu gusaba abakinnyi ngo bave mu kibuga, acibwa ibihumbi 100 by’Amadolari y’Amerika(asaga miliyoni 145 Frw).
Umukinnyi wa Sénégal, Iliman Cheikh Baroy Ndiaye, yahagaritswe imikino ibiri ya CAF, ku myitwarire idakwiye yagaragaje imbere y’umusifuzi, mu gihe mugenzi we Ismaila Sarr na we yahagaritswe imikino ibiri kubera igikorwa nk’icyo.
Ishyirahamwe ry’Umupira w’Amaguru muri Sénégal (FSF) ryaciwe ibihumbi 300 by’Amadolari ya Amerika (asaga miliyoni 435 Frw) kubera imyitwarire idakwiye y’abafana baryo yateje imvururu kandi ikaba ihabanye n’amahame ngengamyitwarire ya CAF.
Iri shyirahamwe kandi rizishyura ibihumbi 300$ (asaga miliyoni 435 Frw) kubera imyitwarire y’abakinnyi n’abatoza b’igihugu cyaryo ndetse n’ibihumbi 15$ (miliyoni 21 Frw) ku myitwarire y’ikipe y’igihugu aho hari abakinnyi batanu bahawe amakarita y’umuhondo icyo gihe.
Ku rundi ruhande,Ishyirahamwe ry’Umupira w’Amaguru mu Bwami bwa Maroc (FRMF), CAF yahagaritse Kapiteni w’iki gihugu, Achraf Hakimi, imikino ibiri yayo irimo umwe usubitse mu gihe cy’umwaka, kuva igihe icyemezo cyafatiwe, kubera imyitwarire idakwiye.
Umukinnyi wo hagati mu kibuga ukina asatira izamu, Ismaël Saibar, yahagaritswe imikino itatu anacibwa amande y’ibihumbi 100 by’Amadolari (asaga miliyoni 145 Frw).
FRMF yaciwe ibihumbi 200$ (hafi miliyoni 291 Frw) kubera imyitwarire idakwiye yaranze abana batoragura imipira ku kibuga muri uwo mukino, ibihumbi 100$ (miliyoni 145 Frw) kubera imyitwarire y’abakinnyi b’ikipe y’igihugu yayo n’abatoza bagiye mu cyumba cya VAR kubangamira abasifuzi kandi bikaba bihabanye n’ingingo ya 82 n’iya 83 mu mategeko ngengamyitwarire CAF igenderaho.
Maroc yaciwe kandi ibihumbi 15$ (miliyoni 21 Frw) kubera abafana bakoresheje urumuri batunga mu maso y’abakinnyi ruzwi nka “lasers” muri uwo mukino.
CAF yateye utwatsi ikirego cyatanzwe n’ishyirahamwe rya Ruhago muri Maroc ryashinjaga irya Senegal kurenga ku mahame ngengamyitwarire ya CAF muri uwo mukino, aho ryasabaga ibihano birimo guhagarikwa.
