Robert Kyagulanyi, uzwi nka Bobi Wine akaba aherutse gustindwa amatora muri Uganda, urugo rwe rwatewe n’abasirikare ba Uganda mu masaha y’igicuku.
Bobi Wine wahunze urugo rwe akajya mu bwihisho, yatangaje ko itsinda ry’abasirikare bipfutse ibintu mu maso mu ijoro ryo kuri uyu wa Gatanu binjiye iwe batangira gukubita abantu bo mu muryango we.
Yagize ati: “Ubu bihereranye umugore wange, Barbie Kyagulanyi, bamujyana ukwe. Icyo bagamije ntabwo kiramenyekana.”
Ubwo ni ubutumwa Bobi Wine yanditse kuri X yahoze ari Twitter.
Amashusho yafashwe nijoro agaragaza abasirikare binjira mu rugo rwa Bobi Wine, umugore we Barbie Kyagulanyi ababaza icyo baje kuhakora ariko ntibavuge.
Robert Kyagulanyi, uzwi nka Bobi Wine, akuriye ihuriro ryiswe National Unity Platform (NUP), amaze igihe atangaje ko yagiye mu bwihisho kuva muri Uganda habaye amatora tariki 16 Mutarama, 2026.
Uyu mugabo ntiyigeze yemera ibyavuye mu matora yatsinzwe na Perezida Yoweri Museveni n’amajwi 71.65%, akaba agomba kuyobora igihugu mu myaka itanu iri imbere.
Perezida Yoweri Museveni ari ku butegetsi kuva mu 1986.
Gen Muhoozi Kainerugaba, umuhungu wa Perezida Yoweri Museveni akaba ari n’Umugaba Mukuru w’Ingabo za Uganda, yanditse kuri X yahoze ari Twitter ko abatavuga rumwe na leta 2,000 batawe muri yombi, abandi 30 bamaze kwicwa.
Bobi Wine we ashinja ubutegetsi bwa Uganda ko muri aya matora bwishe abantu be barenga 100.
