Akarere ka Ruhango kashoye miliyoni 980 Frw mu mushinga wo gukusanya imyanda no kuyitunganya, muri gahunda yo kurengera ibidukikije no gusukura Umujyi wa Ruhango.
Ni ibikorwa byakozwe ku bufatanye n’u Bufaransa, aho bwatanze ibihumbi 429 £ (asaga miliyoni 680 Frw) yaguzwe imashini zitandukanye zikoreshwa mu gutunganya no kubyaza umusaruro imyanda ku kimoteri cyubatse mu Mujyi wa Ruhango, n’ibindi bikoresho byifashishwa mu gukusanya imyanda mu ngo, ndetse na miliyoni 300 Frw zakoreshejwe mu kubaka ahagiye ikimoteri kiri mu Kagari ka Rwoga, Umurenge wa Ruhango.
Umuyobozi w’Akarere ka Ruhango, Habarurema Valens, yavuze ko uyu mushinga ubaye uwa mbere mu mu turere two hanze ya Kigali, ukaba uzafasha mu gutunganya imyanda yo mu Karere ka Ruhango muri gahunda izwi nka ‘Ruhango icyeye’.
Imyanda yose iboneka mu Mujyi wa Ruhango izajya ikusanyirizwa hamwe ijyanwe mu kimoteri cya Rwoga, itandukanywe bitewe n’ubwoko bwayo, noneho ibyazwe ibindi bikoresho by’ingirakamaro ku muntu birimo n’ifumbire y’imborera; aho byitezwe ko bizanagabanya ibisigara mu kimoteri kuko ibyacyuzuzaga byinshi bizaba byasubijwe mu nganda.
Ati “Tugiye gutunganya imyanda hafi ya yose, ku buryo imyanda yajyaga mu kimoteri hazasigara itarenze 10% yonyine, indi yose ikazajya itunganywa hakavamo ibikoresho bitandukanye birimo n’ifumbire.”
Yakomeje avuga ko nyuma yo gukusanya imyanda yo mu Mujyi wa Ruhango, bazakomereza no mu zindi santere nka Kinazi, Gitwe na Buhanda, aho nabo bazajya bakusanya imyanda ikajyanwa ku kimoteri gikuru.
Umuyobozi Mukuru wa COPED, kompanyi izacunga iki kimoteri mu izina ry’Akarere ka Ruhango, Buregeya Paulin, yavuze ko uyu mushinga utangiye hakusanywa toni y’imyanda buri munsi mu mujyi wa Ruhango, izajya ikurwa mu ngo, mu bitebo by’imyanda ku mihanda, ku masoko no ku maduka.
Iyi myanda izajya yegeranyirizwa kuri site zabugenewe hakoreshejwe amagare akoresha ingufu z’amashanyarazi, mu rwego rwo kugabanya ikiguzi, maze ihavanwe ijyanwa ku kimoteri.
Ku kimoteri hazajya havangurirwa imyanda ibora n’itabora, amacupa y’ibyuma n’aya pulasitike, amapine, ibirahure n’indi myanda, bishyirwe ahatandukanye.
Buregeya yakomeje avuga ko bashyizeho uburyo bwo kongera kubyaza umusaruro imwe mu myanda, aho ibikarito, impapuro na pulasitike bizajya bishyikirizwa inganda zibitunganyamo ibindi bikoresho, mu gihe ibimene by’amacupa n’ibirahure byo babisya bikavangwa n’umucanga na sima bigakorwamo amapave, naho imyanda y’ibyatsi n’ibindi bimera bigakurwamo ifumbire y’imborera.
Ati “Imijyi yacu ibangamiwe n’ikibazo cy’imyanda, turimo turareba tuti ni gute iyi myanda twayitunganya ngo ntiyangize. Aha twahageze imyanda yose ijugunywa nta kurobanura, none uyu mushinga uzafasha kujya bajugunya 10% gusa, ibindi bibyazwe umusaruro.”
Yakomeje agaragaza ko ibikorwa nk’ibi bitanga n’akazi, atanga urugero rw’aha mu Ruhango batangiranye abakozi barenga 30, ariko bakazagenda biyongera bakagera kuri 200.
Ababonye akazi muri uyu mushinga nabo bishimira ko batangiye kwinjiza ifaranga, byongeye bakaba banagira uruhare mu gusukura Isi, u Rwanda n’akarere ka Ruhango by’umwihariko.
Biteganyijwe ko nyuma y’amezi atatu uyu mushinga utangiye, hazarebwa niba ibikorwa nk’ibi byakomereza no mu tundi turere, kugira ngo isuku irengera ibidukikije ikomeze yimakazwe hose.
