Magawa, imbeba yo muri Cambodge yamamaye mu gutahura ibisasu bitezwe ahantu hatandukanye ndetse ikabihererwa umudali wa Zahabu, yubakiwe ikibumbano cyo kuzirikana akazi yakoze mu kurengera abantu.
Iyi mbeba yamaze imyaka umunani ku Isi, itegura ibisasu byo mu butaka n’ibindi biturika 100 muri Cambodge. Yabikoze mu myaka itanu. Ni akazi iyi mbeba yatangiye mu 2016.
Magawa yavukiye muri Tanzania mu 2013, mu 2016 yimurirwa muri Cambodge imaze gutozwa gutahura ibisasu.
Iki kibumbano cyakozwe mu ibuye cyashyizwe i Siem Reap, umujyi wa kabiri munini uherereye mu Majyaruguru y’Uburengerazuba bwa Cambodge. Hari mu kwizihiza umunsi mpuzamahanga wahariwe kurwanda za ‘mine’, uba buri wa 4 Mata.
Ibisasu byo mu butaka biracyari ikibazo muri Cambodge. Imibare ya Loni igaragaza ko abarenga miliyoni baba ndetse bagakorera ku butaka burimo mine nyinshi.
Magawa yakomotse muri Tanzania yatojwe n’umuryango wo mu Bubiligi ijyanwa muri Cambodge gutahura ibisasu ibisasu mu 2016.
Yakoreshaga ubushobozi bwayo mu kwihumuriza, igatahura aho ibiturika byahishwe, hanyuma igakorana n’abashinzwe kubitegura bakabikuraho.
Bivugwa ko Magawa yatahuye ibiturika byabarizwaga kuri meterokare 141.000. Ibi bingana n’ibibuga by’umupira 20. Mu minota 20 yabaga imaze kugenzura ahantu hangana n’ikibuga cya Tennis, ikamenya ko nta kintu kibamo.
Iyi mbeba yapfuye kubera izabukuru mu 2022, mu 2020 iyahawe umudali wa zahabu, ishimirwa gutabara ubuzima buri mu kaga.
Kugeza ubu Cambodge yihaye intego y’uko mu 2030 muri iki gihugu nta mine izaba ikirangwa mu butaka bwayo.
Indi mbeba na yo yatojwe aka kazi izwi nka Ronin, mu 2025 yaciye agahigo ko gutahura ibisasu 109 n’ibindi biturika 15 byarashwe ahantu hatandukanye ariko ntibiturike. Ni umurimo iyi mbeba yakoze kuva mu 2021.
Ronin yakoreye akazi mu Majyaruguru ya Cambodge, mu ntara ya Preah Vihear ni yo yakuyeho agahigo ka Magawa.
