Ibihugu bigize ihuriro G7 byatangaje ko byiteguye gufata ingamba za ngombwa kugira ngo bifashe Isi kubona ibikomoka kuri peteroli mu gihe ingabo za Leta Zunze Ubumwe za Amerika na Israel zikomeje intambara n’iza Iran.
Iki cyemezo cyafatiwe mu nama yifashishije ikoranabuhanga, yahuje abaminisitiri b’imari bo muri G7 n’urwego mpuzamahanga rushinzwe ingufu (IEA) mu gihe akagunguru k’ibikomoka kuri peteroli katangiye kugurwa Amadolari 120 kubera iyi ntambara.
Itangazo rya G7 ryasohotse kuri uyu wa 9 Werurwe 2026 rigira riti “Twiteguye gufata ingamba za ngombwa, zirimo no gushyigikira ikwirakwizwa ry’ingufu ku Isi nko kurekura ibiri mu bubiko.”
Ikinyamakuru BBC cyatangaje ko nubwo abaminisitiri bo muri G7 bafashe uyu mwanzuro, batarumvikana niba ibikomoka kuri peteroli biri mu bigega byateganyirijwe ibihe bidasanzwe byatangira gukoreshwa.
Umuyobozi wa IEA, Fatih Birol, yagaragaje ko nubwo igiciro cy’ibikomoka kuri peteroli cyatumbagiye bitewe n’uko inzira yo mu muyoboro wa Hormuz igoye mu gihe cy’iyi ntambara, n’ubusanzwe ibyatunganywaga byagabanyutse.
Birol yagize ati “Usibye imbogamizi zo kunyura mu muyoboro wa Hormuz, ibikomoka kuri peteroli byatunganywaga byaragabanyutse cyane. Ibi biri guteza ibyago byinshi kandi byiyongera ku isoko.”
Minisitiri w’Imari w’u Bufaransa, Roland Lescure, yatangaje ko abaminisitiri bo muri G7 bataragera ku ngingo yo kwemeza niba ibikomoka kuri peteroli biri mu bigega byateganyirijwe ibihe bidasanzwe byatangira gukorwaho.
IEA igaragaza ko ibihugu biyigize bifite utugunguru miliyari 1,2 tw’ibikomoka kuri peteroli byagenewe ibihe bidasanzwe, hakaba n’utundi miliyoni 600 dufatwa nk’umutungo bwite wabyo.
