Umutoza w’Umurundi, Irambona Masudi Djuma Mohamed, watoje amakipe atandukanye arimo na Rayon Sports yo mu Rwanda, yagizwe Umutoza Mukuru wa Etincelles FC yo mu Cyiciro cya Mbere mu Rwanda. Yasinye amasezerano y’umwaka umwe ashobora kongerwa bitewe n’uko azitwara.
Aya makuru yatangajwe n’iyi kipe ibinyujije ku mbuga nkoranyambaga zayo ku mugoroba wo ku wa Mbere, tariki ya 13 Ukwakira 2025. Masudi Djuma yaherukaga mu Rwanda mu 2022 ubwo yatozaga Rayon Sports ku nshuro ya kabiri. Nyuma yaho, yerekeje muri Tanzania aho yatoje amakipe arimo Dodoma Jiji FC na Tabola United.
Etincelles FC, ikipe aherutse kugeramo, ntiyagize intangiriro nziza za Shampiyona y’uyu mwaka. Imaze gukina iminsi itatu ya shampiyona, yanganyije na Gasogi United ubusa ku busa, itsindwa na Marine FC ibitego 2-0. Iyi kipe yari iri mu maboko ya Lomami Marcel wari wasigaranye akazi k’ubutoza nyuma y’uko Seninga Innocent yeguye, ashinja ubuyobozi kutamwubaha no kumubuza amasezerano y’akazi.
Masudi Djuma w’imyaka 48 si mushya mu Rwanda. Yahageze bwa mbere mu 1996 akinira APR FC mu gihe cy’imyaka ibiri, nyuma yaho akomereza muri Kiyovu Sports. Mu mwaka wa 2003 yerekeje muri Rayon Sports, ayifasha gutwara igikombe cya Shampiyona mu 2004 ubwo yatozwaga na Kayiranga Baptiste. Nyuma y’iyo ntsinzi, yerekeje muri Seychelles, ariko agaruka mu Rwanda mu 2006 akinira Rayon Sports umwaka umwe.
Mu 2010, Masudi yahagaritse gukina umupira w’amaguru ubwo yari mu ikipe ya Inter Stars y’iwabo mu Burundi, maze yinjira mu mwuga w’ubutoza. Yatangiye gutoza Rayon Sports muri Gashyantare 2016 nyuma yo gusigarana ikipe Ivan Minnaert agiye muri Kenya. Yayihesheje igikombe cya Shampiyona ya 2016/2017 ndetse n’Igikombe cy’Amahoro cya 2016.
Nyuma yo gutandukana na Rayon Sports mu 2017, yabaye umutoza wungirije muri Simba SC yo muri Tanzania mu mwaka w’imikino wa 2017/2018. Nyuma yaho yaje gutoza AS Kigali mu 2019, ndetse nyuma anayobora Bugesera FC. Yatoje kandi amakipe yo mu Burundi arimo Inter FC na Inter Stars, aho yabaye umutoza wungirije, ndetse anatoza ikipe y’igihugu y’u Burundi y’abato mu 2015. Indi kipe yayoboye ni Bukavu Dawa yo muri Repubulika Iharanira Demokarasi ya Congo.
