Ben Serugo na Mbanza Chance bamenyekanye mu muziki wo kuramya no guhimbaza Imana nka ‘Ben&Chance’, bakoze igitaramo cy’amateka, cyasoje Umunsi Mukuru wa Pasika gisiga abakunzi babo bashize ipfa.
Ni igitaramo cyabaye kuri uyu wa 5 Mata 2026, cyitabirwa ku bwinshi kuko BK Arena yari yuzuye abitabiriye icyo giterane.
Ben na Chance kandi batumiye n’abandi abandi bahanzi bagezweho muri iki gihe, basusurukije abacyitabiriye biratinda.
Umuramyi Pst Ngoga Christophe ni we wabimburiye abandi muri iki gitaramo cyateguwe na Ben na Chance mu gufasha Abanyakigali kwizihiza Umunsi Mukuru wa Pasika cyiswe Easter Jubilee.
Mu ndirimbo ze zirimo Ndabyemeye, yasusurukije abitabiriye iki gitaramo ku buryo budasanzwe.
Nyuma ya Ngoga, itsinda rigizwe n’ababyinnyi bane rizwi nka Move4Christ ryasusurukije abitabiriye igitaramo mu mbyino zigezweho.
Itsinda ry’abakobwa bavukana baririmba indirimbo zo kuramya no guhimbaza Imana Alicia na Germaine na bo bahawe umwanya wo kugaragaza impano yabo mu ndirimbo zabo zirimo nka Uriyo n’Ibendera.
Nubwo aba bahanzi bari kuzamuka n’ingoga ni ku nshuro ya mbere bari baririmbye mu gitaramo gikomeye, bitwaye neza ndetse banyura imitima y’ibihumbi byari muri BK Arena.
Saa 20:39 ni bwo Ben na Chance binjiye ku rubyiniro bwa mbere bahereye ku ndirimbo yabo yitwa Amarira ya Yohani abari muri BK Arena bose bafatanya nabo kuyiririmba.
Isaha n’iminota itari mike Ben na Chance bamaze ku rubyiniro baririmbye indirimbo zabo zikunzwe zirimo Igikombe cyanjye, Mu nda y’Ingumba, Iyi Ntwari, Zaburi, Turavuga n’izindi zitandukanye zakoze ku marangamutima y’abitabiriye igitaramo cyabo.
Kuva bageze ku rubyiniro, abitabiriye igitaramo, baririmbanaga na bo ijambo ku rindi kandi bahagaze, cyane ko indirimbo zabo zizwi na bose.
Bakomeje gutanga Pasika yuzuye ku bakunzi babo, bageze ku ndirimbo bise Zaburi, biba ibindi.
Igice kibanza cy’indirimbo za Ben na Chance cyamaze isaha n’iminota 30 bafatanya n’abitabiriye igitaramo cya Easter Jubilee mu kuririmba.
Nyuma yo kuririmba hakiriwe ku rubyiniro, Pst Julienne Kabanda wakiranywe urukundo rudasanzwe.
Pst Kabanda yigishije ijambo rigaruka ku mugani w’abakobwa 10 aho batanu muri bo bari abanyabwenge abandi ari abapfu.
Yasabye abitabiriye igitaramo kwirinda kujya mu nzira y’abakobwa b’abapfu bateshutse bakabura ubwenge bwo gutegereza umukwe.
Yerekanye ko nubwo umubi akomeje gutsikamira abatuye Isi bose ariko Yezu/Yesu yiteguye gukiza abamugana n’abamwizera hatitawe ku idini cyangwa itorero babarizwamo.
Saa Tanu n’iminota 20 ni bwo Papy Clever na Dorcas nabo baririmba bafatanyije nk’umugabo n’umugore bageze ku rubyiniro baririmba indirimbo zabo zitandukanye ziganjemo n’izo mu gitabo cy’indirimbo.
Igitaramo cya Ben na Chance cyambukiranyije umunsi
Igice cya kabiri cya Ben na Chance, bataramye biratinda. Nubwo amasaha yari akuze ndetse bambukiranyije umunsi batarama, abitabiriye igitaramo cyabo ntibarambiwe.
Ni igitaramo cyatangiye ku wa 5 Mata gisozwa ku wa 6 Mata 2026.
Aba baramyi bahamagawe ku rubyiniro Saa 11:54, nyuma y’uko Papi Clever na Dorcas bari bamaze iminota 34 ku rubyiniro.
Ubwo bagarukaga ku rubyiniro babanje kuririmba indirimbo zirimo Ugushikamijeho Umutima, Yesu Arakora, Mu Nda y’Ingumba, mbere y’uko hacurangwa umukunga, ijyana yasusurukije abitabiriye igitaramo bose.
Chance yaciye amarenga ko iki gitaramo gishobora kuba ngarukamwaka aho yabajije abacyitabiriye niba bifuza ko byaba bityo.
Ati “Murifuza ko cyaba ngarukamwaka? Ni bande babyifuza? Pasika y’ubutaha tuzagaruke?”
Abari muri BK Arena bose bahise basubiza ko bifuza ko cyaba buri mwaka.
Ben yashimiye abitabiriye igitaramo cye n’abaterankunga batandukanye bagishyigikiye kugira ngo kigende neza.
Ben na we yaciye amarenga ko iki gitaramo kigiye kuba ngarukamwaka aho yashimiye itsinda ry’abacuranzi bamufashije rya TNT Band, aryizeza ko umwaka utaha bazaba bari kumwe.
Igitaramo cyasojwe Saa 00:45.
