Rutahizamu wa Inter Miami n’Ikipe y’Igihugu ya Argentine, Lionel Messi, yakomeje kwandika amateka mu mupira w’amaguru, aho yujuje ibitego 900, aba uwa kabiri ubigezeho inyuma ya Cristiano Ronaldo.
Mu rukerera rwo kuri uyu wa Kane, tariki ya 19 Werurwe 2026, nibwo Inter Miami yakinnye na Nashville SC, mu mukino wo kwishyura wa ⅛ cy’irushanwa rya Concacaf Champions Cup.
Umukino ugeze ku munota wa karindwi, Lionel Messi yafunguye amazamu, atsinda igitego cya mbere muri uyu mukino warangiye ikipe ye isezerewe ku gitego cyo hanze kuko zanganyije igitego 1-1.
Nubwo Inter Miami yasezerewe, ntibyabujije Lionel Messi kuzuza ibitego 900 mu mupira w’amaguru, agahigo kari kisangijwe na Cristiano Ronaldo kugeza ubu ufite ibitego 965.
Lionel Messi w’imyaka 38 yujuje ibi bitego nyuma yo kunyura muri FC Barcelone yatsindiye 672, Paris Saint-Germain yatsindiye ibitego 32, Inter Miami yatsindiye 81 n’Ikipe y’Igihugu ya Argentine yatsindiye ibitego 115.
Mu bitego 900, ibigera kuri 755 yabitsindishije ukuguru kwe kw’ibumoso, ibitego 111 abitsindisha ukuguru kw’iburyo, 30 abishyirishamo umutwe n’ibindi bine yakoresheje ubundi buryo.
Ibitego 724 yabitsinze ari hagati mu rubuga rw’amahina, ibitego 176 abitsinda ari hanze y’urubuga rw’amahina, ibitego 112 abitsinda kuri penaliti, naho ibitego 70 abitsinda kuri coup-franc.
Amakipe Messi ufite Ballon D’Or umunani yatsinze ibitego byinshi harimo Sevilla yatsinze 25, Athletic Club yatsinze 24, Atletico Madrid yatsinze 23, Valencia yatsinze 18, Real Madrid yatsinze 17 na Levente yatsinze 16.
